ഈ കഥാകാരന്‍ സ്വാര്‍ത്ഥനാണ് ........

                     ആ  തിരക്കിനിടയിലൂടെ  പലരെയും വകഞ്ഞു മാറ്റി ഒരു സീറ്റ്‌ ഒപ്പിച്ചപ്പോള്‍ ഒരു രാജ്യം വെട്ടിപ്പിടിച്ച ഒരു പോരാളിയെ പോലെയായിരുന്നു അയാള്‍ .സീറ്റില്ലാതെ നില്‍ക്കുന്നവരെ ഒരു പുച്ഛഭാവത്തില്‍ നോക്കി അയാള്‍ ഞെളിഞ്ഞിരുന്നു ."ഞാനൊരു സംഭവം തന്നെ " അയാള്‍ ഉള്ളാലെ ഒന്ന് ചിരിച്ചു ..

                       അയാള്‍ കുറച്ചു നേരം ചുറ്റും നോക്കി ...ആരെങ്കിലും  തന്നെ ശ്രദ്ധിക്കുന്നുണ്ടോ. ഇല്ല  ആരുമില്ല .ആര്‍ക്കും  തന്നെ അറിയില്ല  കഥകള്‍ കുറെ പ്രസിദ്ധീകരിച്ചു  പലതും ശ്രദ്ധിക്കപ്പെട്ടു....ആ കഥകള്‍ എല്ലാരും സ്വീകരിച്ചു പക്ഷെ ഈ കഥാകാരന്‍  ഇന്ന് വെറും ചപ്പ്...ഇങ്ങനെ അയാളുടെ ബാലിശമായ ചിന്തകള്‍ കാടുകയറി ........വണ്ടി സ്റ്റേഷന്‍ വിട്ടു നീങ്ങി ...അപ്പോളാണ് കുപ്പിവളകള്‍ കിലുങ്ങും പോലെ ചിരിച്ചു കൊണ്ട് അവള്‍ എന്റെ അടുത്തു വന്നു നിന്നത് .കൂടെ കുറെ കുട്ടി പട്ടാളവും.വണ്ടി  .അവളുടെ കയ്യില്‍ ഒരു കടല പൊതിയുണ്ട്. .ആ കടലപ്പോതിക്കരികെ കലപില കൂടുന്ന പിള്ളേരും എല്ലാം കൂടി വണ്ടിയില്‍ നല്ല രസമായിരുന്നു.എന്നാല്‍ അവള്‍ക്കതൊന്നും ഒരു പ്രശ്നമെയല്ലായിരുന്നു .
                           ഏതോ ഭിക്ഷാടകരാണെന്നു  ഒറ്റ നോട്ടത്തില്‍ മനസിലാകും .വെള്ളം കണ്ടിട്ട് കാലം കുറെ ആയ ചെമ്പന്‍ തലമുടി അവള്‍ ഇടയ്ക്കിടെ കോതി  വെക്കുന്നുണ്ടായിരുന്നു .അവളുടെ മഞ്ഞപ്പല്ലുകള്‍ കാട്ടിയുള്ള ചിരിക്ക് ഒരു പ്രത്യേക രസമായിരുന്നു .പലരും അവളെത്തന്നെ നോക്കി നില്‍ക്കുന്നു .ചില പൂവന്‍ കോഴികള്‍ അവളുടെ അരികില്‍ തന്നെ സ്ഥാനം പിടിച്ചിട്ടുണ്ട് .അവള്‍ അതൊന്നും കൂസാതെ എന്തൊക്കെയോ പുലമ്പുന്നുണ്ടായിരുന്നു .നമ്മുടെ കഥാകാരന്‍  അവളെയും നോക്കിയിരിക്കാന്‍ തുടങ്ങിയിട്ട നേരം കുറെ ആയി .എന്താണാവോ അയാളുടെ മനസ്സില്‍ ..എന്താന്ന് ഒരു പിടിയുമില്ല.എന്തായാലും വണ്ടി ഒരു സ്റ്റേഷനില്‍ നിര്‍ത്തി .നമ്മുടെ ചെറുകിട അവാര്‍ഡ്‌ ജേതാവ് യാന്ത്രികമായി അവിടെ ഇറങ്ങി.അപ്പോഴും അയാള്‍ അവളെ തന്നെ നോക്കുകയായിരുന്നു .സ്റ്റേഷനില്‍ കാത്തു നിന്ന തന്റെ വണ്ടിയില്‍ കയറി .ഡ്രൈവറോട് വണ്ടി വിടാന്‍ പറഞ്ഞു.അയാളുടെ കണ്ണുകള്‍ പതിയെ അടഞ്ഞു .ആ മയക്കത്തില്‍ അയാള്‍ ഒരു കഥ മെനയുകയായിരുന്നു.അതെ  ,ആ ചെമ്പന്‍ മുടിക്കാരിയുടെ കഥ .അവളായിരുന്നു അയാളുടെ നായിക .അവളെ തന്റെ തൂലികയാല്‍ തന്റേതാക്കി മാറ്റി .അയാളുടെ ചിന്തകള്‍ക്കനുസരിച് അവള്‍ ചലിച്ചു ,ചിരിച്ചു കരഞ്ഞു ....ആ കഥ തുടര്‍ന്നു ..
                         പെട്ടെന്ന് കാര്‍ നിന്നതറിഞ്ഞു അയാള്‍ കണ്ണ് തുറന്നു  .ഡ്രൈവര്‍ പുറത്തു നില്‍ക്കുന്നു .എന്താണെന്നു  അന്വേഷിച്ചപ്പോള്‍ ..ഡ്രൈവര്‍  പറഞ്ഞു.."ഏതോ ഒരു ക്ടാവ് ട്രയിനിന്നു  ചാടിതാത്രേ ".........ഡോര്‍ തുറന്നു അയാള്‍ പുറത്തിറങ്ങി ആളുകള്‍ കൂടി നില്‍ക്കുന്ന സ്ഥലത്തേക്ക് നീങ്ങി .ആരോ പറയുന്നത് കേട്ടു...."കൊറേ നേരായി ഈ സംഭവം ഇവിടിങ്ങനെ കെടക്കുന്നു ..പോലീസ് വരാന്നു പറഞ്ഞിട്ട കാണാനില്ലല്ലോ .എന്തായാലും ആളെ തിരിച്ചറിയാന്‍ എളുപ്പാണ്...മോന്ത നല്ല ക്ലിയര്‍ ആണേ"........ഇതെല്ലാം  കേട്ട് അയാള്‍ ആ മുഖതെക്ക് നോക്കി ...പെട്ടെന്ന് എന്തോ കണ്ടപോലെ അയാള്‍  തരിച്ചു നിന്നുപോയി ......തന്റെ നായിക ഇതാ ചോരയില്‍ കുളിച്ചു കിടക്കുന്നു.കൈകാലുകള്‍ അറ്റു ഒരു രക്തക്കളത്തില്‍ അവള്‍ .............അപ്പോഴും ആ മുഖത്ത് അയാള്‍ക്ക് അവളുടെ മായാത്ത പുഞ്ചിരി കാണാമായിരുന്നു ....
                         അയാള്‍ പതിയെ തിരിഞ്ഞു നടന്നു ..അയാളുടെ ചുണ്ടില്‍ ഒരു ചെറു പുഞ്ചിരി .അത്  മറ്റൊന്നുമായിരുന്നില്ല ......തന്റെ കഥയ്ക്ക് അനുയോജ്യമായ ക്ലൈമാക്സ്‌ തന്നെ തേടി വന്നതോര്‍ത്തായിരുന്നു.......
                 അതെ ഈ കഥാകാരന്‍ സ്വാര്‍ത്ഥനാണ് ......................